"8 noyabr-Zəfər günü"nə həsr olunmuş turnir keçirildi

"Təhsil" Respublika İdman Mərkəzinin 4 nömrəli Respublika İxtisaslaşdırılmış Olimpiya Ehtiyatları Uşaq-Gənclər İdman-Şahmat Məktəbi PHŞ-in və Nəsimi Rayon Gənclər İdman İdarəsinin təşkilatçılığı, 247 saylı məktəbin təşkilatı dəstəyi ilə 28 oktyabr 2022-ci il tarixində, Nəsimi rayon ümumtəhsil məktəblərinin şagirdləri arasında "8 noyabr-Zəfər günü"nə həsr olunmuş 12 yaşadək uşaqlar arasında şahmat turniri keçirilib.

Turnirdən öncə məktəb rəhbərliyi, məşqçi- müəllimlər, fiziki tərbiyə müəllimləri, şahmatçılar Nəsimi rayon şəhidlərinin xatirəsini əbədiləşdirmək üçün salınmış Zəfər Parkını ziyarət edib, şəhidlərin xatirəsinə ucaldılmış abidənin önünə gül dəstələri qoyub. 

Ardından turnirin açılış mərasimi olub, dövlət himni səsləndirilib, torpaqlarımızın azadlıqı uğrunda şəhid olanların xatirəsi bir dəqiqəlik sükutla yad edilib. 

Olimpiya sistemi üzrə keçirilən turnirdə 25 məktəb komandası olmaqla 75 şahmatçı iştirak edib. Yekun nəticədə 247 saylı tam orta məktəbin komandası 1- ci yer, 54 saylı tam orta məktəbin komandası 2-ci yer, Hədəf STEAM liseyinin komandası 3-cü yeri tutub.

Eyni zamanda yarışda şəxsi hesbda ən yüksək nəticəni 54 saylı məktəbin şagirdi Cahandar Azadəliyev, qızlar arasında isə 247 saylı məktəbin şagirdi Əsnad Baxşızadə göstərib.

Yarışın mükafatlandırmasında 4 nömrəli İOEUGİŞM-nin və Nəsimi Rayon Gənclər İdman idarəsinin rəhbərliyi, 44 günlük vətən müharibəsi qaziləri iştirak edib, komanda və şəxsi hesabda qaliblər, eyni zamanda komandaların kapitanları medal ,diplomla təltif olunub.