"Kəpəz"in legioneri: "Neftçi" ilə aramızda böyük prinsipiallıq var"
Azərbaycanda ən güclü azarkeşlər "Kəpəz"ə məxsusdur
"Zirə”yə qarşı oyun pis alınmadı. Fikrimcə, məşqçinin verdiyi bütün tapşırıqları yerinə yetirdik, yalnız sonuncu dəqiqədən başqa. Özümüzü daha yaxşı tərəfdən göstərmək imkanımız olacaq".
Qazet.az-ın məlumatına görə, bunu "Kəpəz"in futbolçusu Mixeil Ergemlidze klubun mətbuat xidmətinə müsahibəsində deyib.
Gürcüstanlı hücumçu bildirib ki, "Zirə"yə 1:2 hesabı ilə uduzduqları Azərbaycan Premyer Liqasının ilk tur matçında qələbə qazana bilərdilər: Mənim, Rauf Əliyevin fərqlənmək üçün imkanlarımız oldu. Hətta qol da vurduq, amma ofsayd olduğundan hesaba alınmadı".
Sözügedən qarşılaşmada komandasının yeganə qolunun müəllifi olan 23 yaşlı forvard əvvəlcədən fərqlənəcəyini bildiyini öyləyib: "Məşqçi və komanda yoldaşlarım oyundan əvvəl yaxşı motivasiya vermişdilər. Düşünürəm ki, qollarımın davamı olacaq".
Ergemlidze bu gün "Bakcell Arena"da "Neftçi"yə qarşı keçirəcəkləri II tur matçına da toxunub: "Ciddi hazırlaşmışıq, azarkeşlərimizi sevindirmək üçün hər şey edəcəyik. Bu oyunu tarixi derbi adlandırırlar və bilirəm ki, arada böyük prinsipiallıq var".
Onun sözlərinə görə, Azərbaycanda ən güclü azarkeşlər "Kəpəz"ə məxsusdur: "Dəstəyə görə onlara minnətdarıq. Mehriban kollektimiz var. Hamı bir-birinə ailədə olduğu kimi diqqətli davranır".
Futbolçu Gəncənin əla şəhər olduğunu vurğulayıb: "İnsanları çox xeyirxahdırlar. Hələ harasa gedə bilməmişik. Mərkəzdəki parkda olmuşuq, xoşumuza gəlib".
Hücumçu "Kəpəz"in stadion probleminə görə evdə oynamamasına da münasibət bildirib: "Ev yox, səfər komandası kimi oynamaq məcburiyyətindəyik. Bu da pisdir. Əgər Gəncədə oynasaq, daha yaxşı nəticələr əldə edə bilərik".