Makron rəqibini müdafiə edəcək, yoxsa Bakını?
Fransa prezidentliyinə namizəd Valeri Pekreslə bağlı vəziyyət getdikcə gərginləşir
Azərbaycanda müvəqqəti yerləşdirilən rus sülhməramlı kontingentinin məsuliyyət zonasına qeyri-qanuni səfər edən Fransa prezidentliyinə namizəd Valeri Pekreslə bağlı vəziyyət getdikcə gərginləşir.
Qazet.az xəbər verir ki, bu barədə axar.az-a danışan politoloq Fərhad Məmmədov bildirib ki, hazırda Fransada Prezident Makronun reaksiya verməsi üçün təzyiq dalğası artır.
“Onun necə reaksiya verəcəyini görmək maraqlı olacaq. Pekres Makronun rəqibidir. Makron Pekresə dəstək verməyə razı olarsa, onun reytinqini artıracaq. Əgər bundan imtina etsə və səfərin qanunsuz olduğunu qeyd etsə, bu, Azərbaycanla münasibətlərdə Fransaya xal qazandıracaq.
Lakin unutmayaq ki, Fransa XİN-i Bakıya qarşı hədələrlə reaksiya verdi. Fransa xarici işlər nazirinin Milli Assambleyada deputatın təxribat xarakterli sualına cavabına gəlincə, bu, ATƏT-in Minsk Qrupunun həmsədri olan ölkə üçün qətiyyən yolverilməzdir. Fransa Azərbaycanın ərazi bütövlüyünü tanıyır. Müharibənin son günlərində Makron regionun xəritəsini göstərərək bu faktı qeyd edib. Əgər Fransa vətəndaşı Azərbaycan ərazisinə qanunsuz səfər edərək cinayət törədirsə, o zaman rəsmilər buna hansısa formada haqq qazandıra bilməzlər. İstənilən bəraət bu cinayətdə iştirak kimi qələmə alınacaq. Fransa da eyni yolla addımlayır - palçığa ikinci dəfə girir. 44 günlük müharibədə Fransanın birtərəfli mövqeyi Parisin uduzan ölkənin, ədalətsizliyin tərəfində olmasına səbəb oldu. Beləliklə, o, Cənubi Qafqazda nüfuzunu itirdi. Müharibədən sonra Fransa tərəfindən bölgədəki mövqelərini bərpa etmək üçün bir neçə addım atıldı. Sonra Azərbaycan Prezidenti bunları müsbət addım kimi qiymətləndirdi. Və bu kəskin küncləri birtəhər düzəltmək üçün Makron hətta Əliyevlə Paşinyan arasında görüş üçün Brüsselə də gəldi. Bu müsbət siqnallar Bakıda da eşidildi. Təbii ki, ölkə rəhbərliyindən də müvafiq reaksiya oldu”, - politoloq deyib.
F.Məmmədovun fikrincə, Fransa XİN rəhbərinin hazırkı demarşının Azərbaycan-Fransa münasibətləri üçün böyük nəticələri olacaq:
“Birincisi, heç kimin Azərbaycanın səfiri ilə belə formada danışmağa haqqı yoxdur, çünki qanunsuz hərəkətlərə yol verən fransız siyasətçisidir. İkincisi, bu, Fransanın Bakıya qarşı ilk qanunsuz hərəkəti də deyil. Fransa XİN-in Qarabağda işğal olunmuş Azərbaycan yaşayış məntəqələrinin saxta adları ilə Fransa şəhərlərinin "qardaşlaşmış şəhərləri" məsələsində illərdir Azərbaycanı necə aldatdığını unutmaq olmaz. Sonra Fransa XİN-i Bakını əmin etdi ki, yerli bələdiyyələrin qərarına reaksiya vermək səlahiyyəti yoxdur. Bu, Bakı vəkilləri tutaraq Parisdən bu məsələni həll etməyi tələb edənə qədər, illər boyu davam etdi.
Yəni hüquqi baxımdan haqlı mövqedə olan Bakının cavabı daha ağrılı olacaq”.