Türkmənistan Prezidenti Sərdar Berdiməhəmmədov ölkənin eks-prezidenti, atası Qurbanqulu Berdiməhəmmədova məxsus “Ağ xan” atına heykəl ucaldılması barədə qərar imzalayıb. Abidə Axal vilayətində  ucaldılacaq. 

Qazet.az bu barədə “Turkmenportal”a istinadən xəbər verir.

Abidə Türkmənistan Prezidentinin Axaltəkə atçılıq kompleksinin ərazisində olacaq.

Bu, Berdiməhəmmədovlar sülaləsinin hakimiyyəti dövründə Türkmənistanda atlara ucaldılan üçüncü abidə olacaq. 2013-cü ildə Kopetdağ vadisində, Beynəlxalq Atçılıq Kompleksinin girişində “Poladlı” atına heykəl kompozisiyası hazırlanıb. 2014-cü ildə Aşqabadda Türkmənistanın gerbində təsviri olan “Yanardağ” atına abidə qoyulub.

“Ağ xan” Qurbanqulu Berdiməhəmmədovun şəxsən özünün yetişdirdiyi atdır. 2017-ci ildə “Ağ xan”nın üzərindəki atlı Aşqabadda döyüş sənətləri üzrə V Asiya Oyunlarının açılış mərasimində məşəli yandırıb. 2018-ci ildə at 10 metri 4 saniyəyə qət edərək Ginnesin “Rekordlar Kitabı”na düşüb.

Eks-prezident atlara xüsusi hörmətlə yanaşır.  O, Axaltəkə atlarına həsr olunmuş dörd kitab və bir neçə şeir yazıb.