Avropa Komissiyasının Prezidenti Estoniyada Rusiya ilə sərhədə baş çəkəcək

Avropa Komissiyasının Prezidenti Ursula fon der Lyayen oktyabrın 10-da Estoniyaya səfər edəcək, burada respublika rəhbərliyi ilə görüşəcək və Narva şəhərindəki Estoniya-Rusiya sərhədindəki sərhəd-keçid məntəqəsinə baş çəkəcək.

Qazet.az “Interfaks”a istinadən xəbər verir ki, günün birinci yarısında o, ölkənin Baş naziri Kaya Kallas ilə görüşəcək, bundan sonra onlar birgə mətbuat konfransı keçirəcəklər.

Bundan əlavə, AK rəhbəri Estoniya Prezidenti Alar Karis ilə görüşəcək. Fon der Lyayen kommunizm qurbanlarının xatirəsinə ucaldılmış abidəni də ziyarət edəcək.

Daha sonra Avropa Komissiyasının Prezidenti və Estoniyanın Baş naziri helikopterlə Rusiya ilə həmsərhəd Narva şəhərinə uçacaq və burada Narva sərhəd-keçid məntəqəsinə səfər nəzərdə tutulub.