Azərbaycan Basketbol Liqasında 3-cü tur yekunlaşıb

Oktyabrın 29-da “Sərhədçi” İdman Mərkəzinin idman zalında keçirilən iki qarşılaşma ilə Azərbaycan Basketbol Liqasının (ABL) 3-cü turuna yekun vurulub.

Basketbol Federasiyasından Qazet.az-a verilən məlumata görə, günün ilk görüşündə “NTD BK” komandası “Zirvə Astara BK” basketbolçuları ilə qarşılaşıb. Görüş “NTD BK”nın 84-71 hesablı qələbəsi ilə yekunlaşıb.

Matçın ən məhsuldar basketbolçular “NTD BK”dan Stenford Vilyams (27 xal, 4 asist), “Zirvə Astara BK”dan isə Rashard Kriukşenk (32 xal, 7 ribaund) olublar.

Turun sonuncu oyunu isə region komandası “Olimpik Şəki BK” ilə “Sərhədçi PİK” basketbolçuları arasında olub. Qarşılaşma “Sərhədçi PİK” basketbolçuları 102-72 hesablı qələbəsi ilə yekunlaşıb.

Görüşün ən məhsuldar basketbolçuları “Olimpik Şəki BK”dan Ceyson Brauer (27 xal, 5 ribaund), “Sərhədçi PİK”dan isə Maykl Vinn (25 xal, 4 asist) olublar.

Qeyd edək ki, 4 -cü turun oyunları 2 və 5 noyabr tarixlərində Sərhədçi İdman Mərkəzində keçiriləcək.