Mədəniyyətin təbliğinə dəstək verəcək yeni assosiasiya yaradılıb

Azərbaycanda mədəniyyətin təbliğinə dəstək verəcək "Cultural Network House Assosiasiyası"nın təqdimat mərasimi keçirilib.

Qazet.az xəbər verir ki, assosiasiyanın sədri Aynur Süleymanzadə layihənin məqdəsindən danışıb.

O bildirib ki, qurum 2022-ci ilin mart ayında yaradılıb: "Assosiasiyasının məqsədi Azərbaycanın milli-mənəvi irsini, ənənələrini və zəngin mədəniyyətini dünya xalqlarına çatdırmaq, eyni zamanda ölkənin mədəni həyatında fəal iştirak edərək təqdimatlar, vebinarlar, masterklasslar və s. təşkil etməkdir. Assosiasiya qısa zamanda yaranmasına baxmayaraq, "Ustad Dərsləri", "Biz Sənətkarıq", "Art Terapiya" kimi bir neçə mədəniyyət tədbirləri keçirib, bir çox incəsənət nümayəndələri ilə əməkdaşlıq edib. Eyni zamanda “Sənətlə toxunuş” adlı layihəsi qrant alıb. Layihənin məqsədi, sosial-psixoloji vəziyyəti gərgin olan və sığınacaqlarda yaşayan ana və uşaqlarda art terapiya metodu vasitəsilə emosional vəziyyətin yaxşılaşdırılmasına və stresin azaldılmasına, özgüvənin artırılmasına dəstək olmaqdır".

Sədr vurğulayıb ki, qurum beynəlxalq müstəvidə də Azərbaycan mədəniyyətinin təbliğini həyata keçiririr: "Beləki, nümayəndə heyəti ötən ay "Türkiyə-Azərbaycan Dostluq, İşbirliyi ve Dayanışma Vəkfi''nin dəvəti ilə əslən Şuşadan olan ilk türk vəkil qadın Sürəyya Ağaoğlunun anadan olmasının 119-cu il dönümünə həsr edilmiş simpoziumda iştirak edib və hər iki qurum arasında mədəni tədbirlərin hər iki ölkədə mütəmadi təşkilinə və mədəniyyətin təbliğinə dair əməkdaşlıq qərarı verilib".

Assosiasiya sədri qurumun növbəti il üçün zəngin tədbirlər planı olduğunu qeyd edib: "Ümumilikdə tədbirlər planında bir sıra mədəniyyət layihələri, xarici səfərlər və ölkədaxili festivallar yer alacaqdır".

Əməkdar artist, Prezident mükafatçısı, sənətşünaslıq üzrə fəlsəfə doktoru, dosent Toğrul Əsədullayev çıxış edərək yeni təşkilatın ölkə mədəniyyətinə tövhə verəcəyinə inandığını qeyd edib.

Təqdimat mərasimi gənc musiqiçilərin ifaları ilə yekunlaşıb.