Mərakeş Fransa ilə oyundakı hakimdən FİFA-ya şikayət etdi

Mərakeş Kral Futbol Federasiyası Qətərdə keçirilən dünya çempionatının yarımfinal mərhələsinin Fransa ilə oyundakı hakim heyəti ilə bağlı Beynəlxalq Futbol Federasiyasına (FİFA) şikayət edib.

Bu barədə cümə axşamı Mərakeş Federasiyasının mətbuat xidməti məlumat yayıb.

Fransa dünya çempionatının yarımfinalında çərşənbə günü Mərakeşliləri 2:0 hesabı ilə məğlub edib. Görüşün baş hakimi meksikalı Arturo Ramos Palazuelos olub. Mərakeş Federasiyası rəhbərliyinin sözlərinə görə, hakim Afrika yığmasının xeyrinə iki penaltini təyin etməyib. Qurum video köməkçi hakim (VAR) sisteminin bu anlara reaksiya verməməsindən də xeyli təəccübləndiyini dilə gətirib.

Qeyd edək ki, Mərakeş millisi dekabrın 17-də Xorvatiya yığması ilə üçüncü yer uğrunda oyuna çıxacaq. Fransızlar isə ertəsi gün dünya çempionatının finalında Argentina ilə qarşılaşacaq.