Moldova ilə aqrar sahədə əməkdaşlıq ediləcək

Azərbaycanın Kənd Təsərrüfatı Nazirliyinin Aqrar İnnovasiya Mərkəzi ilə Moldovanın Kənd Təsərrüfatının İnkişafı və Modernizasiyası Agentliyi arasında kənd təsərrüfatı sahəsində müasir texnologiyaların transferi və davamlı təcrübə mübadiləsi ilə bağlı tərəfdaşlıq müqaviləsi imzalanıb.

Qazet.az xəbər verir ki, bu barədə Azərbaycan tərəfi məlumat yayıb.

Sənədə əsasən tərəflər aqrar sahədə rəqəmsallaşma, texnologiya və innovasiyaların tətbiqi ilə bağlı təcrübə mübadiləsi aparacaq, bu sahənin rəqabət qabiliyyətinin artırılması, bazarlarla davamlı əlaqələrin təmin edilməsi, kənd təsərrüfatı mütəxəssisləri arasında bilik və təcrübə mübadiləsinin aparılması üzrə əməkdaşlıq edəcək. Əməkdaşlıq çərçivəsində dövlət-özəl sektoru tərəfdaşlığı yolu ilə fermerlərə kənd təsərrüfatı texnologiyası xidmətinin çatdırılması, aqrar sahədə rəqəmsallaşdırma, müasir texnologiyaların tətbiqi və iqlim dəyişikliyinin kənd təsərrüfatı sektoruna təsirlərinin azaldılması sahəsində təcrübələrin bölüşdürülməsi də nəzərdə tutulur. Görüş zamanı hər iki tərəf əməkdaşlıqda maraqlı olduğunu bildirib, gələcək əməkdaşlığın perspektivləri ətrafında fikir mübadiləsi aparılıb.

Xatırladaq ki, ötən gün Bakıda Azərbaycan ilə Moldova arasında iqtisadi əməkdaşlıq üzrə birgə hökumətlərarası komissiyanın 4-cü iclası keçirilib.