Rusiya yeni təlimlərə başladı - Qarabağ döyüşlərindəki təcrübədən istifadə

Rusiya hərbi təlimlərdə Qarabağ döyüş təcrübəsindən istifadə edəcək

Rusiyanın Orenburq vilayətində, Mərkəz Hərbi Dairəsinin poliqonlarında Şanxay Əməkdaşlıq Təşkilatına üzv ölkələrin hərbi kontingentlərinin iştirakı ilə təlimlər başlayıb. 

Qazet.az xəbər verir ki, bu haqda Rusiya KİV-ləri xəbər verir.

 “Dinc missiya-2021” təlimlərində Rusiyanın mühəndis qoşunları Suriya və Dağlıq Qarabağdakı döyüş təcrübəsi əsasında praktiki vəzifələr yerinə yetirəcək. Mərkəz Hərbi Dairəsinin mühəndis qoşunlarının rəisi, general-mayor Dmitri Koruts jurnalistlərə belə deyib.

“Müasir silahlı münaqişələrin, ilk növbədə Suriya və Dağlıq Qarabağdakı münaqişələrin təcrübəsi Mərkəz Hərbi Dairəsinin mühəndis bölmələrinin “Dinc missiya-2021” təlimlərində həyata keçirəcəyi praktiki fəaliyyətlərin əsasını təşkil edəcək. Belə ki, təlimlərin final mərhələsində koalisiya qoşun qruplaşmalarının fəaliyyətinin təmin edilməsi üçün hava və yerüstü mobil dəstələr tətbiq ediləcək”,-general bildirib.

Koruts əlavə edib ki, hava dəstələrinin tərkibində BSM-1 minalama sistemləri ilə təchiz edilmiş Mi-8 nəqliyyat-döyuş təyyarələri də olacaq. Bu vertolyotlar qısa müddət ərzində təyin edilmiş hüdudlara mina döşəyə bilir.

Qeyd edək ki, Rusiya ordusu bundan əvvəl Belarusla birgə keçirilən “Qərb-2021” irimiqyaslı hərbi təlimlərində də Qarabağ döyüşlərinin təcrübəsindən istifadə etmişdi.

Virtualaz.org