Səlim Müslümovun cinayət işinin yeni təfərrüatları

Bakı Ağır Cinayətlər Məhkəməsində vəzifə səlahiyyətlərindən sui-istifadə, 27 milyon manat büdcə pulunu mənimsəmə, o cümlədən rüşvət almaqda təqsirləndirilən sabiq əmək və əhalinin sosial müdafiəsi naziri Səlim Müslümovun cinayət işi üzrə məhkəmə prosesi davam etdirilib.

Qazet.az xəbər verir ki, Haqqin.az-ın müxbirinin verdiyi məlumata görə, növbəti məhkəmə iclasında bir neçə şahid dindirilib. İlk olaraq “Şıxlı” MMC-nin təsisçisi və direktoru Səfadar Cavadov çıxış edib. O bildirib ki, 2014-cü ildə təsis etdiyi şirkət Sumqayıt Əlillər Mərkəzində elan olunmuş tenderin qalibi olub. Şirkətə 198 min manat vəsait köçürülüb: “Tenderdə 3 şirkət iştirak edib. Şirkətimiz qalib oldu. Və 2019-cu ildə şirkət bağlandı. 2014-cü ildən sonra tenderlərdə iştirak etmədik”.

Şahid istintaqa ifadəsində qeyd edib ki, yuxarıda göstərilən məbləğdən 42 min 139 manatı Əmək və Əhalinin Sosial Müdafiəsi Nazirliyinin sektor müdiri Dəyanət Fərəcova “geri pul” kimi köçürülüb. Lakin prosesdə Cavadov istintaqa verdiyi ifadəni təsdiqləməyib və heç kimə pul vermədiyini bildirib: “Sadəcə sənədləri imzaladım. Bunu məndən “Muğanbank”ın direktoru Arif (hazırda rəhmətlik - red. ) xahiş etdi.

Şahid qismində dindirilən Tural Hacıyev bildirib ki, onun və atası Söhbət Hacıyevin (həmçinin mərhum) adına 4 şirkət açılıb. Həmin şirkətlər tenderlərdə qalib gələrək Qusar, Xaçmaz, Oğuz rayonlarında əlil və şəhid ailələri üçün 9 ev tikiblər. Evlərin tikintisi üçün Əmək və Əhalinin Sosial Müdafiəsi Nazirliyinin şöbə müdiri Natiq Əzizova 45 min manat ayrılıb.

Şahid istintaqa verdiyi ifadəsini təsdiq edərək bildirib ki, E.Əzizov atasını nazirliyə çağıraraq hər evə görə 5 min manat ödəməli olduğunu deyib.

Məhkəmədə dindirilən şahid Abuzər Babayev ifadəsində bildirib ki, idman zalında işləyən tanışı onun adına şirkət açıb: “Əlavə olmadım - müqabilində idman zalında pulsuz məşq edim. Bankdan nağd pul çıxardılar, mən də imzaladım”.

Şahidlərdən Anar Rəhimov bildirib ki, dayısı İsrafil Həsənov qardaşı oğlunun adına 7 şirkət açıb və bu şirkətlərlə Əmək Nazirliyi arasında satınalma müqavilələri bağlanıb: “Hər ay 700 manat verirdilər. Amma bu vəziyyət məni narahat edirdi. Buna görə də o, 2016-cı ildə bu şirkətləri tərk etdi”.

Məhkəmə prosesi oktyabrın 17-də davam etdiriləcək.