Bakı 20˚C Mostly cloudy w/ showers

Şuşalı media nümayəndələri erməni vandalizmindən geniş məlumatlar yazacaq - Vüsal Quliyev

Siyasət 15:07 12 sen, 2021

Şuşada maraqlı təzad: Azərbaycan quruculuğu və erməni vandalizmi

Şuşalı media nümayəndələri erməni vandalizmindən geniş məlumatlar yazacaq - Vüsal Quliyev

Əslən Şuşadan olan bir qrup media nümayəndəsinin bu gün Şuşa şəhərinə səfəri başlayıb.

Qazet.az APA-ya istinadən xəbər verir ki, onlar 30 ildən sonra doğma şəhərlərini gəzir, digər tarixi yerləri ziyarət edir.

Qeyri-Hökumət Təşkilatlarına Dövlət Dəstəyi Agentliyin Müşahidə Şurasının sədr müavini, Prezident Administrasiyasının məsul əməkdaşı Vüsal Quliyev APA-ya açıqlamasında bildirib ki, jurnalistlər 30 il boyunca erməni vandallarının tarixi abidələri, evləri dağıtdığının şahidi olur:

“Onlar ölkə başçımızın rəhbərliyi altında görülən quruculuq işləri ilə tanış olacaqlar. Jurnalistləri bura gətirməkdə məqsəd 30 illik həsrətə son qoymaqdır. Eyni zamanda onlar müxtəlif beynəlxalq təşkilatlarda, platformalarda təmsil olunurlar. Jurnalistlər burda gördükləri erməni vandalizmi və quruculuq işləri barədə dünya ictimaiyyətinə geniş məlumat verəcəklər”.

Vüsal Quliyev Qeyri-Hökumət Təşkilatlarının nümayəndələrinin, jurnalistlərin Şuşa səfərindən gözləntilərini də açıqlayıb:

“İstəyirik ki, səfərə gələnlər erməni vandalizmini yerində görsünlər və əməkdaşlıq etdikləri beynəlxalq təşkilatları bu barədə məlumatlandırsınlar. Müxtəlif hesabatlar hazırlayıb beynəlxalq məhkəmələrə müraciət etsinlər. Son dövrlər QHT-lər bu sahədə kifayət qədər fəallıq göstərir. Bundan sonra onların işi daha da artacaq. Ümid edirəm ki, onlar yeni təşəbbüs göstərəcəklər. Biz hərtərəfli informasiya mübarizəsinə hazır olmalıyıq. Yeni yaranan agentlikdə qrant müsabiqələrində prioritetimiz Qarabağ mövzusudur”.