XİN mətbuat katibi Laçın yolundan danışdı

“Laçın yolunun blokadaya alınması ilə bağlı iddialar “feyk”dir”.

Qazet.az xəbər verir ki, bu barədə Azərbaycan Xarici İşlər Nazirliyinin Mətbuat Xidmətinin rəhbəri Ayxan Hacızadə tviterdə yazıb.

“Blokada” ilə bağlı yayılan dezinformasiyaya baxmayaraq, Beynəlxalq Qırmızı Xaç Cəmiyyətinə (BQXK) məxsus maşınlar və Ermənistandan gələn təcili yardım avtomobilləri Laçın yolu ilə sərbəst keçir. Blokada ilə bağlı iddialar “feyk”dir”, - paylaşımda deyilir.

Xatırladaq ki, Şuşadan keçən Xankəndi-Laçın yolunda BQXK-ya məxsus maşınların və ermənilərə məxsus təcili yardım avtomobilinin hərəkət etməsinə şərait yaradılıb.

Qarabağda faydalı qazıntı yataqlarının qanunsuz istismarı əleyhinə Şuşadan keçən Xankəndi-Laçın yolunda keçirilən etiraz aksiyası 8 gündür davam edir. Belə ki, Şuşa ərazisində Rusiya sülhməramlılarının nəzarətində olan yolun bir hissəsində etiraz aksiyası azərbaycanlı aktivistlər və ekologiya üzrə qeyri-hökumət təşkilatlarının (QHT) üzvləri tərəfindən Qarabağ iqtisadi rayonunda ekoloji terrora son qoyulması tələbi ilə keçirilir.

2022-ci il dekabrın 3-də və 7-də Rusiya sülhməramlı kontingentinin komandanlığı ilə aparılmış müzakirələrin nəticəsi olaraq İqtisadiyyat Nazirliyi, Ekologiya və Təbii Sərvətlər Nazirliyi, İqtisadiyyat Nazirliyi yanında Əmlak Məsələləri Dövlət Xidməti və “AzerGold” Qapalı Səhmdar Cəmiyyətinin mütəxəssislərindən ibarət heyət Rusiya sülhməramlı kontingentinin müvəqqəti yerləşdiyi Azərbaycan ərazilərində faydalı qazıntı yataqlarının qanunsuz istismarı, bundan irəli gələn ekoloji və digər fəsadlarla bağlı ilkin monitorinq aparmalı idi. Lakin sülhməramlıların hərəkətsizliyi ucbatından monitorinq baş tutmayıb.