Zatulinin Ermənistana girişi qadağan edildi

Rusiya Federasiyası Dövlət Dumasının MDB işləri, Avrasiya inteqrasiyası və həmvətənlərlə əlaqələr komitəsinin sədri Konstantin Zatulinin Ermənistana girişi qadağan edilib.

Qazet.az erməni Teleqram kanallarına istinadən xəbər verir ki, bu barədə Paşinyan ailəsinə məxsus “Haykakan Jamanak” qəzetinin saytı bildirib.

Sayt yazır ki, Konstantin Zatulin Ermənistanda arzuolunmaz şəxs elan edilib.

Qeyd olunub ki, Zatulin müsahibələrində dəfələrlə Ermənistan hakimiyyətini 44 günlük müharibədə məğlub olmaqda ittiham edib:

"Üstəlik, Ermənistanın daxili işlərinə müdaxilə edən Zatulin Nikol Paşinyanın getməli olduğunu dəfələrlə dilə gətirib. Zatulin hətta Ermənistan hakimiyyətini Ermənistan-Rusiya münasibətlərinə zərbə vurmaqda ittiham edib. Ermənistana son səfəri zamanı “Yerkir Media”ya verdiyi müsahibədə Zatulin baş naziri Ermənistanın suveren ərazisindən “dəhliz” verilməsini imzalamaqda ittiham edib".

Qeyd edək ki, həmin müsahibədə Zatulin deyib: "Mümkün dəhlizlə bağlı sualları imzalayanlara vermək lazımdır, “dəhliz” razılaşmasını Paşinyan imzalayıb”.

Əlavə edək ki, bundan əvvəl Zatulinin Azərbaycana girişi də qadağan olunub.